අධිකරණ නියෝග නොතකා හැරීම පුඤ්ඤසෝමට පාරාවළල්ලක්! අධිකරණය අන්දන්න ගිය පොලිසියට මහේස්ත්‍රාත්වරයාගෙන් දැඩි දෝෂාරෝපණයක්! පොලිස්පතිට එරෙහිව අපහාස කිරීමේ නඩුවකට ගොනුව අභියාචනාධිකරණයට!
'AKD ආණ්ඩුව'
සම්පූර්ණ කාලයම හිටියොත්
රට පුරා චක්‍රලේඛයක් නිකුත් කරන්නැයි දුන් නියෝගය වෙනුවට පොලිස් කොට්ඨාස තුනකට උපදෙස් දීලා! මාස පහකට ආසන්න කාලයක් අධිකරණ නියෝගය ක්‍රියාත්මක නොකිරීම ගැන ගම්පහ මහේස්ත්‍රාත්වරයාගෙන් දැඩි විවේචනයක්.
2026 ඔක්තෝබර් 21 | විශේෂ පුවත් වාර්තාව
ශ්‍රී ලංකා පොලිසියේ ඉහළම නිලධාරියා වන පොලිස්පතිවරයා අධිකරණ නියෝග ක්‍රියාත්මක කිරීමට අපොහොසත් වීම හේතුවෙන් අධිකරණයට අපහාස කර ඇති බවට ගම්පහ මහේස්ත්‍රාත් අධිකරණය නිගමනය කර ඇති බව වාර්තා වේ.
ඒ අනුව පොලිස්පතිවරයාට එරෙහිව අධිකරණයට අපහාස කිරීම සම්බන්ධයෙන් නීතිමය ක්‍රියාමාර්ග ගැනීම සඳහා අදාළ ලිපිගොනුව අභියාචනාධිකරණයේ සභාපති විනිසුරුවරයා වෙත යොමු කිරීමට ගම්පහ මහේස්ත්‍රාත් බන්ධුල ගුණරත්න මහතා පියවර ගෙන තිබේ.
මෙම සිදුවීම ශ්‍රී ලංකාවේ නීතියේ ආධිපත්‍යය, අධිකරණයේ ස්වාධීනත්වය සහ පොලිස් දෙපාර්තමේන්තුවේ වගවීම පිළිබඳ බරපතළ ප්‍රශ්න මතු කරන සිදුවීමක් බවට පත්ව ඇත.
අහිංසක පුරවැසියන්ට එරෙහිව පදනම් විරහිත නඩු පැවරීම වැළැක්වීම සඳහා දිවයිනේ සියලු පොලිස් නිලධාරීන් ආවරණය වන පරිදි චක්‍රලේඛයක් නිකුත් කරන ලෙස ලබාදුන් අධිකරණ නියෝගය ක්‍රියාත්මක නොකිරීම සම්බන්ධයෙන් පොලිස්පතිවරයාට එරෙහිව අධිකරණයට අපහාස කිරීමේ නඩු කටයුතු ආරම්භ කිරීම සඳහා අදාළ ලිපිගොනුව අභියාචනාධිකරණ සභාපති විනිසුරුවරයා වෙත යොමු කිරීමට ගම්පහ මහේස්ත්‍රාත් බන්ධුල ගුණරත්න අද (21) නියෝග කර තිබේ.
මෙම තීරණයට පසුබිම් වී ඇත්තේ ගම්පහ දූෂණ මර්දන අංශයේ පොලිස් නිලධාරීන් විසින් චාමර චතුරංග මාරසිංහ නමැති පුද්ගලයාට එරෙහිව පවරන ලද මත්ද්‍රව්‍ය නඩු දෙකක් සම්බන්ධයෙන් මතු වූ ගැටලුය.
අදාළ නඩු සම්බන්ධයෙන් මීට පෙර සිදු කළ විමර්ශනයේදී පොලිසියේ ක්‍රියාකලාපය දැඩි ලෙස විවේචනය කළ මහේස්ත්‍රාත්වරයා, විත්තිකරුට රුපියල් ලක්ෂ දෙකක වන්දි ගෙවීමට ද නියෝග කර තිබිණි.
මෙහිදී මතුවන ප්‍රධානතම ප්‍රශ්නය වන්නේ අධිකරණය විසින් පොලිස්පතිවරයා වෙත පැහැදිලිව ලබාදුන් නියෝගයක් ක්‍රියාත්මක කිරීමට පොලිස් දෙපාර්තමේන්තුව මාස පහකට ආසන්න කාලයක් ගතවී තිබියදීත් අපොහොසත් වූයේ මන්ද යන්නයි.
ඔක්තෝබර් 21 වැනිදා නඩුව කැඳවූ අවස්ථාවේදී පොලිස් නීති කොට්ඨාසය විසින් ඉදිරිපත් කර තිබුණේ බස්නාහිර පළාත උතුර භාර නියෝජ්‍ය පොලිස්පතිවරයා විසින් ඔක්තෝබර් 19 වැනිදා ගම්පහ, කැලණිය සහ මීගමුව පොලිස් කොට්ඨාසවලට නිකුත් කළ මාර්ගෝපදේශ මාලාවකි.
එහෙත් අධිකරණය ලබාදී තිබූ නියෝගය වූයේ දිවයිනේ සියලුම පොලිස් නිලධාරීන්ට බලපාන චක්‍රලේඛයක් පොලිස්පතිවරයා විසින් නිකුත් කළ යුතු බවයි.
එම වෙනස පෙන්වා දුන් මහේස්ත්‍රාත්වරයා විවෘත අධිකරණයේදී “මේක මාව අන්දවන්න කරන දෙයක්” යනුවෙන් ප්‍රකාශ කළ බවයි එහි සිටි වාර්තාකරුවන් අනාවරණය කළේ .
පොලිසියේ ක්‍රියාකලාපය පිළිබඳව තවදුරටත් අදහස් දැක්වූ මහේස්ත්‍රාත්වරයා, අධිකරණ නියෝගයකට පවා පොලිසිය මෙවැනි ආකාරයෙන් ප්‍රතිචාර දක්වන්නේ නම් සාමාන්‍ය පුරවැසියන්ගේ පැමිණිලි සහ විමර්ශන සම්බන්ධයෙන් පොලිසියේ වගවීම කෙබඳුදැයි ප්‍රශ්න කර තිබේ.
මෙම නඩුවේදී තවත් වැදගත් කරුණක් මතු විය. එනම් පොලිස් නිලධාරීන්ගේ කාර්යක්ෂමතාව මැනීම සඳහා මාසිකව පවරන නඩු සංඛ්‍යාව වැඩි කිරීමට දිරිගන්වන ක්‍රමවේදයයි.
එවැනි ඉලක්ක මත ක්‍රියාත්මක වන පොලිස් ක්‍රමවේදයක් පුරවැසියන්ට එරෙහිව පදනම් විරහිත නඩු පැවරීමට හේතු විය හැකි බවට මහේස්ත්‍රාත්වරයාගේ නිරීක්ෂණ මගින් බරපතළ අනතුරු ඇඟවීමක් ඉදිරිපත් වී තිබේ.
මෙය එක් පුද්ගලයකුට එරෙහිව පවරන ලද මත්ද්‍රව්‍ය නඩු දෙකකට පමණක් සීමා නොවන අතර, පොලිස් බලතල භාවිතය, පුරවැසි අයිතිවාසිකම් සහ අධිකරණයේ ස්වාධීනත්වය සම්බන්ධයෙන් පුළුල් සංවාදයක් ඇති කරන සිදුවීමකි.
කෙසේ වෙතත්, ලිපිගොනුව අභියාචනාධිකරණයට යොමු කිරීම යනු පොලිස්පතිවරයා අභියාචනාධිකරණය විසින් දැනටමත් අධිකරණයට අපහාස කිරීමේ වරදට වරදකරු කර ඇති බව නොවේ. ඒ සම්බන්ධයෙන් ඉදිරි නීතිමය තීරණ ගැනීම අදාළ අධිකරණ ක්‍රියාවලියට යටත් වේ.
නීතිය ඉදිරියේ සියලු දෙනා සමානද? දැන් එය පරීක්ෂාවට!
මෙම සිද්ධියේ වැදගත්ම කරුණ වන්නේ පොලිස්පතිවරයාට එරෙහිව චෝදනාවක් මතුවීම පමණක් නොවේ. රාජ්‍ය බලය හොබවන ඉහළම නිලධාරීන් පවා අධිකරණයේ අධිකාරියට යටත් බව ප්‍රායෝගිකව තහවුරු වන්නේද යන්නයි.
අධිකරණ නියෝග ක්‍රියාත්මක කිරීමේ වගකීම පැවරී ඇති ආයතනයක ප්‍රධානියාටම එරෙහිව අධිකරණයට අපහාස කිරීමේ නීතිමය ක්‍රියාමාර්ගයක් සලකා බැලීමට සිදුවීම, රටේ නීතිය ක්‍රියාත්මක වන ආකාරය පිළිබඳ අවධානය යොමු කළ යුතු තත්ත්වයකි.
නීතිය රැකීමට පත්කළ පුද්ගලයා නීතියට අවනත නොවන්නේ නම්, සාමාන්‍ය පුරවැසියාගෙන් නීතියට අවනත වීම අපේක්ෂා කළ හැක්කේ කෙසේද?ගම්පහ මහේස්ත්‍රාත් අධිකරණයෙන් වාර්තා වන මෙම පියවරෙන් පසුව, පොලිස්පතිවරයාගේ වගකීම පිළිබඳ නීතිමය ප්‍රශ්නයට පිළිතුරු සෙවීම අභියාචනාධිකරණය හමුවේ සිදුවිය හැකි ඉදිරි ක්‍රියාමාර්ග මත රඳා පවතිනු ඇත.
කොස්තාපල් පුඤ්ඤසෝම සම්බන්ධයෙන් දුෂණ චෝදනා රැසක් එල්ල වි තිබේන අතර ඒ සම්බන්ධයෙන් අප කල අනාවරණයන් සියල්ලම පහත දැක්වේ.
