නීතිඥ සංගමය සටන තීව්ර කරයි! 22 වැනි සංශෝධනයට එරෙහි පෙත්සමට මෝසමක්!
‘සියලු විනිසුරුවරුන්ම සෘජුවම පාර්ශ්වකරුවන් බැවින් ලබැඳියාවන් අතර ගැටුමක් – පූර්ණ විනිසුරු මඩුල්ලක් අත්යවශ්යයි’ – 22 වැනි සංශෝධනයට එරෙහි පෙත්සමට නීතිඥ සංගමයෙන් නව මෝසමක්
ආණ්ඩුක්රම ව්යවස්ථාවට ගෙන එන ලද ’22 දෙවන ආණ්ඩුක්රම ව්යවස්ථා සංශෝධන’ පනත් කෙටුම්පතට එරෙහිව ශ්රේෂ්ඨාධිකරණය හමුවේ ගොනු කර ඇති පෙත්සම සම්බන්ධයෙන්, ශ්රේෂ්ඨාධිකරණයේ සියලුම විනිසුරුවරුන්ට පවතින උනන්දුව හා පැහැදිලි ලබැඳියාවන් අතර ගැටුමක් (Conflict of Interest) පවතින හේතුවෙන් එය පූර්ණ විනිසුරු මඬුල්ලක් ඉදිරියේ විමසා බලන ලෙස ඉල්ලා ශ්රී ලංකා නීතිඥ සංගමය විසින් නව මෝසමක් ඉදිරිපත් කර තිබේ.
22 වැනි ආණ්ඩුක්රම ව්යවස්ථා සංශෝධන පනත් කෙටුම්පත ආණ්ඩුක්රම ව්යවස්ථාවේ 3 වන ව්යවස්ථාවට පටහැනි බැවින් එය සම්මත කර ගැනීමට ජනමත විචාරණයක් අවශ්ය වන බවට තීන්දුවක් ලබා දෙන ලෙස ඉල්ලමින් ශ්රී ලංකා නීතිඥ සංගමයේ BASL සභාපති රජීව් අමරසූරිය සහ ලේකම් නලින් ද සිල්වා විසින් ශ්රේෂ්ඨාධිකරණයට ඉදිරිපත් කල පෙත්සමක් අමතරව මෙම මෝසම ඉදිරිපත් කර තිබේ.
ශ්රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්රාමික වයස් සීමාව ඉහළ නැංවීම සඳහා ගෙනැවිත් ඇති 22 වැනි ආණ්ඩුක්රම ව්යවස්ථා සංශෝධන පනත් කෙටුම්පත ආණ්ඩුක්රම ව්යවස්ථාවේ 3 වන ව්යවස්ථාවට පටහැනි බැවින් එය සම්මත කර ගැනීමට ජනමත විචාරණයක් අවශ්ය වන බවටත්, ආණ්ඩුක්රම ව්යවස්ථාවේ 132(3)(iii) ව්යවස්ථාව යටතේ සියලුම විනිසුරුවරුන්ගෙන් සමන්විත පූර්ණ විනිසුරු මඬුල්ලක් (Full Court) ඉදිරියේ මෙම නඩුව විමසීමට නියෝග කරන ලෙසටත් තීන්දුවක් ලබා දෙන ලෙස ඉල්ලමින් ශ්රී ලංකා නීතිඥ සංගමයේ සභාපති රජීව් අමරසූරිය සහ ලේකම් නලින් ද සිල්වා විසින් පසුගිය අගෝස්තු 24 වැනි දින ශ්රේෂ්ඨාධිකරණය වෙත උක්ත පෙත්සම ඉදිරිපත් කර තිබුණා.
කෙසේ නමුත් ශ්රී ලංකා නීතිඥ සංගමයේ සභාපති රජීව් අමරසූරිය සහ ලේකම් නලින් ද සිල්වා යන මහත්වරුන්ගේ අත්සනින් යුතුව S.C. (S.D.) No: SC/SD/47/26 යටතේ ගොනු කර ඇති මෙම නව මෝසම මඟින් අධිකරණ පනතේ 49(3) වගන්තිය පෙන්වා දී තිබෙනවා.
එහි සඳහන් වන්නේ යම් විනිසුරුවරයෙකුට අදාළ කරුණක් සම්බන්ධයෙන් පෞද්ගලික උනන්දුවක් හෝ බලපෑමක් ඇත්නම්, එය වෙනත් විනිසුරුවරුන් විසින් විමසිය යුතු බවයි.
මෙම සංශෝධන පනත් කෙටුම්පත මඟින් උසස් අධිකරණ විනිසුරුවරුන්ගේ සේවා කාලය සහ විශ්රාම යන වයස් සීමාවන් වෙනස් කිරීමට යෝජනා කර ඇති බැවින්, ශ්රේෂ්ඨාධිකරණයේ විනිසුරුවරුන් සියලු දෙනාම මෙම කාරණය සම්බන්ධයෙන් සෘජුවම පාර්ශ්වකරුවන් බවට පත්වන බව නීතිඥ සංගමය වැඩිදුරටත් පෙන්වා දෙනවා.
ඒ අනුව, පවතින ලබැඳියාවන් අතර ගැටුම්කාරී තත්ත්වය මඟහරවා ගැනීම සඳහා මෙම නඩුව ඉදිරි අගෝස්තු 31, සැප්තැම්බර් 01 හෝ 02 යන දිනවලින් එකක විවෘත අධිකරණයේදී පූර්ණ විනිසුරු මඬුල්ලක් (Full Court) ඉදිරියේ සලකා බලන ලෙසට ඔවුන් වැඩිදුරටත් ඉල්ලා සිටිනවා.
