දිලන්ත මාලගමුවගේ ඉඩම් ගනුදෙනු අර්බුදය! කොළඹ 07 බාන්ස් පෙදෙසේ ඉඩම් ගනුදෙනුවක ව්‍යාජ ඔප්පු චෝදනා! සුඛෝපභෝගී වාහන 7ක් සහ ලක්ෂ 565ක් ගැන CID විමර්ශන!

දිලන්ත මාලගමුව ඇතුළු ප්‍රධාන සැකකරුවන්ට ආධාර අනුබල දුන් බවට චෝදනා ලැබූ නුගේගොඩ ව්‍යාපාරිකයෙක් රිමාන්ඩ් – බැංකු ගිණුම් තහනම් කිරීමටත් අධිකරණ නියෝග!

කොළඹ 07, බාන්ස් පෙදෙසේ පිහිටි ඉහළ වාණිජ වටිනාකමකින් යුත් ඉඩමක් ව්‍යාජ ඔප්පු සකස් කර ප්‍රසිද්ධ සමාගමකට විකිණීමේ සිද්ධියකට ආධාර අනුබල දුන් බවට චෝදනා එල්ල වූ නුගේගොඩ වාහන වෙළෙඳ ව්‍යාපාරිකයෙකු නොවැම්බර් 05 වැනිදා දක්වා රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් අසංක එස්. බෝදරගම මහතා ඔක්තෝබර් 28 වැනිදා නියෝග කර තිබේ.

මෙලෙස රක්ෂිත බන්ධනාගාරගත කර ඇත්තේ අපරාධ පරීක්ෂණ දෙපාර්තමේන්තුව විසින් අත්අඩංගුවට ගනු ලැබූ නුගේගොඩ ප්‍රදේශයේ පදිංචි ශාන්ත විතාන ගමගේ නමැති ව්‍යාපාරිකයෙකි.

අදාළ ඉඩම් ගනුදෙනුවට සම්බන්ධ ප්‍රධාන සැකකරුවන් ලෙස නම් කර ඇති මෝටර් රථ ධාවන ශූර දිලන්ත මාලගමුව, ඩෙස්මන්ඩ් අමරසිංහ සහ සමන් ජයවීර යන පුද්ගලයන්ට ආධාර අනුබල දීම සම්බන්ධයෙන් සැකකරු අධිකරණයට ඉදිරිපත් කර තිබේ.

ව්‍යාජ ඔප්පු සකස් කිරීමටත් අධිකරණ නඩුවකටත් මුදල් යෙදවූ බවට චෝදනා

අපරාධ පරීක්ෂණ දෙපාර්තමේන්තුව අධිකරණය හමුවේ කරුණු දක්වමින් සඳහන් කර ඇත්තේ සැකකාර ව්‍යාපාරිකයා ප්‍රධාන සැකකරුවෙකු සමඟ නීතිඥවරයෙකු ඉදිරියේ ගිවිසුමකට එළඹ ඇති බවයි.

එම ගිවිසුම අනුව ව්‍යාජ ඔප්පු සකස් කිරීමේ ක්‍රියාවලියට සහ ඉඩමේ අයිතිය සම්බන්ධයෙන් පැවති දිසා අධිකරණ නඩු කටයුත්තකට මුදල් යොදවා ඇති බවට විමර්ශනවලදී තොරතුරු අනාවරණය වී ඇතැයි CID නිලධාරීන් අධිකරණයට දැනුම් දී තිබේ.

බැංකු ගිණුම්වලට ලක්ෂ ගණනින් මුදල්!

විමර්ශන නිලධාරීන් ඉදිරිපත් කළ කරුණු අනුව සැකකරුගේ බැංකු ගිණුම්වලට අවස්ථා කිහිපයකදී විශාල මුදල් ප්‍රමාණයක් බැර වී තිබේ.ඒ අනුව රුපියල් ලක්ෂ 210ක්, තවත් අවස්ථා දෙකකදී රුපියල් ලක්ෂ 50 බැගින් ලක්ෂ 100ක් සහ තවත් රුපියල් ලක්ෂ 45ක් ලැබී ඇති බව අධිකරණයට දැනුම් දී ඇත.

මීට අමතරව පෞද්ගලික බැංකුවක රුපියල් ලක්ෂ 565ක මුදලක් පවතින බවද CID නිලධාරීන් සඳහන් කර තිබේ.එම මුදල් සම්බන්ධයෙන් වැඩිදුර විමර්ශන සිදුකිරීම සඳහා අදාළ බැංකු ගිණුම් තහනම් කරන ලෙසද අපරාධ පරීක්ෂණ දෙපාර්තමේන්තුව අධිකරණයෙන් ඉල්ලා සිටියේය.

ඉඩම විකිණීමෙන් පසු සුඛෝපභෝගී වාහන හතක්!

මෙම සිද්ධියේ විශේෂ අවධානයට ලක්ව ඇති කරුණක් වන්නේ අදාළ ඉඩම් ගනුදෙනුවෙන් අනතුරුව සැකකරුට සුඛෝපභෝගී වාහන හතක් ලැබී ඇති බවට CID විසින් අධිකරණයට කරුණු ඉදිරිපත් කිරීමයි.

එම වාහන අතර තිබූ ටොයෝටා ලෑන්ඩ් කෘසර් රථයක් කුලී පදනම මත ආයතනයකට ලබා දී ඇති බවද අනාවරණය කර තිබේ.තවත් වාහන තුනක් සමන් ජයවීර නමැති සැකකරුටත්, වාහන දෙකක් ඩෙස්මන්ඩ් අමරසිංහටත් ලබා දී ඇති බව CID සඳහන් කර ඇත.

ඉතිරි වාහනයක් සෞඛ්‍ය අමාත්‍යාංශයට සම්බන්ධ වෛද්‍යවරයෙකුට කුලී පදනම මත ලබා දී ඇති බවද අධිකරණය හමුවේ ප්‍රකාශ වී තිබේ.

මෙම වාහනවල සැබෑ හිමිකාරිත්වය, ගනුදෙනුවල නීත්‍යනුකූලභාවය සහ මුදල් හුවමාරු වූ ආකාරය සම්බන්ධයෙන් විමර්ශන තවදුරටත් සිදුකෙරේ.

මාලගමුව සම්බන්ධයෙන් ඉදිරිපත් කර ඇති අනෙකුත් චෝදනා අතර ජපානයේ සමාගමක් සමඟ ඇතිකරගත් බව කියන ව්‍යාපාරික ගිවිසුමක් උල්ලංඝනය කිරීම, ජපාන ජාතික කාන්තාවකගේ ආයෝජන මුදල් අයථා ලෙස භාවිත කිරීම සහ කුරුණෑගල අක්කර 14ක ඉඩමක් සම්බන්ධ දේපළ ආරවුලක් ද වේ.එමෙන්ම ඇමෙරිකානු ඩොලර් මිලියන 2.2කට ආසන්න මුදලක් වංචා කළ බවටත්, ජපානයට ඇතුළුවීම තහනම් කර ඇති බවටත් චෝදනා ඉදිරිපත් කර තිබේ.

විත්තියෙන් චෝදනා ප්‍රතික්ෂේප කරයි

සැකකරු වෙනුවෙන් පෙනී සිටි නීතිඥ නුවන් රත්නායක මහතා අධිකරණය හමුවේ සඳහන් කළේ තම සේවාදායකයා නීත්‍යනුකූල ව්‍යාපාරික කටයුත්තක් සඳහා මුදල් ආයෝජනය කර ඇති බවයි.

එහෙත් අදාළ ඉඩම සම්බන්ධයෙන් ව්‍යාජ ඔප්පු සකස් කර ඇති බවක් තම සේවාදායකයා දැන නොසිටි බව නීතිඥවරයා ප්‍රකාශ කළේය.එසේම ඉඩම මිලදී ගත් ව්‍යාපාරිකයා හෝ එහි මුල් හිමිකරුවන් මෙම සිද්ධිය සම්බන්ධයෙන් පැමිණිලි කර නොමැති බවද විත්තිය අධිකරණයට පෙන්වා දුන්නේය.

2023 වසරේ ඉදිරිපත් කළ පැමිණිල්ලක් සම්බන්ධයෙන් දීර්ඝ කාලයක් විමර්ශන සිදු නොකර 2026 වසරේදී යළි විමර්ශන ආරම්භ කිරීම පිටුපස වෙනත් අරමුණක් පැවතිය හැකි බවටද විත්තිය තර්ක කළේය.ඒ අනුව ඕනෑම සුදුසු කොන්දේසියක් යටතේ සැකකරු ඇප මත මුදාහරින ලෙස නීතිඥවරයා ඉල්ලා සිටියේය.

ඇප ප්‍රතික්ෂේපයි – බැංකු ගිණුම් තහනම්

දෙපාර්ශ්වයේ කරුණු සලකා බැලූ කොළඹ ප්‍රධාන මහේස්ත්‍රාත්වරයා විමර්ශන තවමත් අවසන් වී නොමැති බව සැලකිල්ලට ගනිමින් සැකකරු නොවැම්බර් 05 වැනිදා දක්වා රක්ෂිත බන්ධනාගාරගත කිරීමට නියෝග කළේය.සැකකරුගේ අදාළ බැංකු ගිණුම් තහනම් කිරීමටත් විමර්ශන ප්‍රගතිය කඩිනමින් අධිකරණයට වාර්තා කිරීමටත් මහේස්ත්‍රාත්වරයා නියෝග කර තිබේ.

කොළඹ නගර මධ්‍යයේ පිහිටි වටිනා ඉඩමක් සම්බන්ධයෙන් මතුව ඇති මෙම සිද්ධිය තුළ ව්‍යාජ ලේඛන සකස් කිරීම, විශාල මුදල් හුවමාරු සහ සුඛෝපභෝගී වාහන ගනුදෙනු පිළිබඳ චෝදනා රැසක් විමර්ශනයට ලක්ව ඇත.කෙසේ වෙතත්, මෙම චෝදනා මෙතෙක් අධිකරණය හමුවේ ඔප්පු වී නොමැති අතර සැකකරුවන් සියලුදෙනාටම නිර්දෝෂීභාවයේ පූර්ව නිගමනය හිමිවේ.