ඥානසාර හිමියන්ගේ වසර 6ක සිරදඬුවම සම්පූර්ණයෙන්ම නීති විරෝධියි – හිටපු අග්‍රවිනිශ්චයකාර සරත් එන්. සිල්වා
'AKD ආණ්ඩුව'
සම්පූර්ණ කාලයම හිටියොත්
කොළඹ: පූජ්‍ය ගලගොඩඅත්තේ ඥානසාර හිමියන්ට නියම කරන ලද වසර හයක (06) සිරදඬුවම නීතියෙන් අවසර දී ඇති උපරිම දඬුවම් සීමාව ඉක්මවා යන බවත්, එමගින් එම දඬුවමේ නීත්‍යානුකූලභාවය පිළිබඳව බරපතල ගැටලු මතුවන බවත් හිටපු අග්‍රවිනිශ්චයකාර සරත් එන්. සිල්වා මහතා ප්‍රකාශ කළේය.
සඳුදා (12) කොළඹදී සමස්ත ලංකා බෞද්ධ මහා සම්මේලනය මගින් සංවිධානය කරන ලද ‘බුදුදහම සහ සිංහල බෞද්ධ උරුමය සුරැකීමේ ජාතික සම්මේලනය’ ඇමතූ හිටපු අග්‍රවිනිශ්චයකාරවරයා අවධාරණය කළේ අදාළ දඬුවම සම්පූර්ණයෙන්ම නීති විරෝධී මෙන්ම ඉතා අසාමාන්‍ය තත්ත්වයක් බවයි.
නීතිමය පදනම සහ පූර්වාදර්ශය පිළිබඳ ගැටලුව
මෙම නඩුවේ නීතිමය පසුබිම පැහැදිලි කළ සරත් එන්. සිල්වා මහතා පෙන්වා දුන්නේ, අදාළ අපරාධ නඩුව විභාග කළ මහේස්ත්‍රාත්වරයා විසින් අභියාචනාධිකරණයේ සභාපති විනිසුරු ප්‍රීති පද්මන් සුරසේන මහතා වෙත ලිපියක් යොමු කර ඇති බවයි. තමන්ගේ අධිකරණය තුළ මෙවැනි සිදුවීමක් වූ බවත්, මහේස්ත්‍රාත් අධිකරණයට දඬුවම් නියම කිරීමට ඇති බලතල සීමිත බැවින් වඩාත් බරපතල දඬුවමක් ලබාදීම සඳහා මෙම කරුණ අභියාචනාධිකරණය වෙත යොමු කරන බවත් එම ලිපිය මගින් දන්වා තිබූ බව හිටපු අග්‍රවිනිශ්චයකාරවරයා සඳහන් කළේය.
මෙහිදී පැනනගින ප්‍රධාන නීතිමය ගැටලුව විග්‍රහ කරමින් ඔහු වැඩිදුරටත් මෙසේ පැවසීය:
“ගැටලුව තියෙන්නේ අන්න එතැනයි. මෙහි ඇති නීතිමය තත්ත්වය කුමක්ද? අධිකරණයට අපහාස කිරීම සම්බන්ධයෙන් වන දඬුවම වන්නේ රුපියල් 1,500කට නොවැඩි දඩයක් හෝ මාස 18කට නොවැඩි කාලයක ලිහිල් සිරදඬුවමකි. ඒ කියන්නේ අවුරුදු එකහමාරක් විතරයි.”
අභියාචනාධිකරණයේ බලතල සීමා
නීතියෙන් උපරිම වශයෙන් මාස 18ක සිරදඬුවමක් පමණක් පනවා ඇති අවස්ථාවක, ප්‍රීති පද්මන් සුරසේන මහතා විසින් වසර හයක සිරදඬුවමක් නියම කර ඇති බවට සරත් එන්. සිල්වා මහතා චෝදනා කළේය. වසර හයක දඬුවම් නියම කිරීමේ ප්‍රතිපාදනය අදාළ වන්නේ අභියාචනාධිකරණයට සෘජුව කරනු ලබන අපහාසයන්ට පමණක් බවත්, මෙවැනි වෙනත් කරුණු සම්බන්ධයෙන් එවැනි ප්‍රතිපාදනයක් නොමැති බවත් ඔහු පෙන්වා දුන්නේය.
ජනාධිපති සමාව සාධාරණීකරණය කිරීම
මෙම නීතිමය තත්ත්වයන් සහ පවතින නීති විරෝධී බව පදනම් කරගනිමින්, හිටපු ජනාධිපති මෛත්‍රීපාල සිරිසේන මහතා විසින් මීට පෙර ඥානසාර හිමියන්ට ලබාදුන් ජනාධිපති විශේෂ සමාව සාධාරණීකරණය කිරීමට ද හිටපු අග්‍රවිනිශ්චයකාරවරයා මෙහිදී පියවර ගත්තේය. මහා සංඝරත්නය, දේශපාලනඥයන් සහ විවිධ සංවිධාන කිහිපයක නියෝජිතයින්ගේ විශාල සහභාගීත්වයෙන් පැවැති මෙම ජාතික සම්මේලනයේදී රටේ වත්මන් නීතිමය හා ශාසනික කරුණු රැසක් පිළිබඳව දීර්ඝ වශයෙන් සාකච්ඡා කෙරිණි.
